Astudiaethau Achos - Cyswllt Ffermio

Agrisgôp - Pont Senni

Sefydlwyd y grŵp Agrisgôp hwn gan griw o ffermwyr ifanc o ardal Pontsenni, er mwyn trafod y potensial oedd ganddynt i gymryd rhan yn y Cynllun Cymorth i Newydd Ddyfodiaid. Fe wnaethon nhw ddefnyddio y broses Agrisgôp i ddatblygu eu busnesau a systemau fferm unigol. Daeth y broses â aelodau y grŵp at ei gilydd a’u galluogi i rannu a datblygu syniadau busnes am gyfnod. Cafwyd cyfarfodydd a thrafodaethau gyda Asiantaeth yr Amgylchedd a’r arbenigwr tir glas, Charlie Morgan. Yn ogystal â hyn, astudiodd y grŵp y potensial o ddatblygu prosiectau ynni gwynt a hydro ar eu ffermydd.

Ffermwr blaengar yn elwa o Cyswllt Ffermio

Mae Eurig Jenkins yn ffermwr llaeth ifanc uchelgeisiol, sy’n bwrw ymlaen gyda’i gynlluniau i ehangu gyda help Cyswllt Ffermio. Eurig, 29, a’i dad Aeron sy’n ffermio 140 erw Fferm Pentrefelin yn Nhalsarn ger Llanbedr Pont Steffan, un o Ffermydd Arddangos y Rhaglen Datblygu Llaeth, ac yn y blynyddoedd diwethaf, bu’n rhentu 440 erw o dir ychwanegol yn yr ardal Ar hyn o bryd, mae’n cymryd teirawr i odro’r 270 o wartheg, ac am ei fod yn bwriadu cynyddu nifer y gwartheg godro i 380 dros y ddwy flynedd nesaf, roedd Eurig yn benderfynol o edrych ar ffyrdd o leihau’r amser godro. Fe’u cynghorwyd i gofrestru ar gyfer Cynllun y Fferm Gyfan gan Cyswllt Ffermio - sy’n cynnig cymorth un-i-un cymorthdaledig er mwyn helpu busnesau fferm i ddatblygu – ac mae’r ddau’n falch iawn iddynt wneud hynny.

Cyngor arbenigol yn rhoi gobaith i bâr ifanc o ffermwyr llaeth

DIM ond amser byr sy’n rhaid ei dreulio yng nghwmni’r ffermwyr llaeth ifanc, Elfyn Jones a’i wraig Meinir, cyn i’w hoptimistiaeth ynglyˆn â’u dyfodol yn y byd ffermio greu argraff arnoch. Yn ôl y pâr, y cymorth proffesiynol a gawsant drwy Cyswllt Ffermio, wedi iddynt gofrestru ar gyfer Cynllun y Fferm Gyfan yn gyntaf ac yna’r Gwasanaeth Cynghori Ffermwyr, sydd i ddiolch am y gobaith hwn. “Mae wedi rhoi persbectif newydd i ni ac wedi ein helpu i ailedrych ar sut rydyn ni’n rhedeg y fferm. Mae’r newidiadau y buom yn eu trafod gyda’r cynghorwyr a chytuno i’w gwneud wedi bod yn ysgogiad mawr a  gwyddom i ble’n union mae’r busnes yn mynd a’r targedau sy’n rhaid eu cyrraedd,” meddai Elfyn, sy’n 38 oed.

Cyngor arbenigol Cynllun y Fferm Gyfan yn dwyn Ffrwyth

Ers mis Mehefin 2010, mae’r ffermwyr Andrew a Richard Jenkins wedi bod yn mwynhau ffrwyth y cyngor a gawsant drwy Gynllun y Fferm Gyfan ... ar ffurf mefus blasus, coch. Cofrestrodd y tad a’r mab o Fferm Pont, Betws Cedewain, ger y Drenewydd, ar gyfer gwasanaeth mentora Cyswllt Ffermio y llynedd ar ôl mynychu gweithdy CALU ar fefus ger Aberystwyth. Meddai Andrew, “Bu gennym fefus i’w casglu’ch hun ar ein fferm ers sawl blwyddyn, ond yn dilyn cyngor gan ein hymgynghorydd Cynllun y Fferm Gyfan, Chris Creed o ADAS, rydym bellach wedi prynu sawl ‘twnnel Sbaenaidd’. Mae i’r rhain ochrau agored i’n galluogi i gael cnwd llawer cynharach.”